〈中華副刊•主編精選〉綴汝兮字尾去看海

予臺南府城一个上愛海兮詩人，王羅蜜多

■紀小樣

大海！這馬閣加一个人來矣！

汝應該袂相計較才著。

 

蹽過濁水溪 peh過南鯤鯓

著是汝兮西拉雅 (Si-lá-iah)

遐爾愛看海，毋驚予人

嫌蕭壠（Siau-lâng）

 

彼工暗時，我予

汝兮詩句tshuā來來

日頭有光 撓圇仔燒

駁岸懸懸 掛兩蕊雲

我兮目睭伐袂過海尾彼粒燈塔

 

轉來暝夢才知影

家己變成一隻烏色兮海鳥

翼股擛咧擛咧飛上天

毋驚暗暝規天頂兮星咧甲我笑

喙舌咬咧 沓沓仔想

汝兮心志到底是啥貨？

 

看了！講無忝是騙人──

燈塔有光若海湧 又閣共伊

捒過來阮兮目睭尾

翼股拚命共擛咧擛咧

飛上天；飛到所有的光

攏看袂著兮所在

 

我才目屎拭焦越頭看

看到汝兮心肝窟仔

遠遠 著一片海

一燒 著炤──

幾若百公里