-
林秀蓉
日鬚軟軟，風是時間長長的罟仔網
捒開歲月舷窗，點著一葩向望的漁火
海面鮮沢水螺聲，略略仔入心肝
巡闊莽莽的文化海流到底有偌爾深？
親像渡鳥依倚連暝的河溪渡頭
暗漠漠的港路，好佳哉有月娘來炤
擘金同心圓目睭，討海人的掀天大志
Tao 勇士，一刀一斧操舟下心晟
熱情敢若船桮，理性可比敆做伙的船殼
共禮芋添甲滇滇滇，聽候新船落水
海上 Tatala宛然是舵公跤踏的風火輪
穿藤甲戴銀帽，規年迵天毋管日曝雨淋
跤手扭掠縛彼條海洋囝兒的丁字帶
天猶貓霧仔光，飛烏徙泅來矣！
飄撇討海人知影，大海唱出豐收的歌聲
徛佇船頭搖泏，攑懸Ayo火把呼請
徛氣古調是欲送予大自然的金曲
滿天濟濟颺颺飛的音符，予飛烏神引
七彩珊瑚相尋清泱泱的水世界
拋網故事源頭，海洋是地球母親的搖笱
越頭蹽轉去日頭公上蓋看顧的火山島
雲尪無閒氐頁氐頁捽伊的目尾，日聶日聶看
樂暢的海豬仔獨獨咧擛尾溜滾躘
跟綴青春的槳仔，勻勻仔過渡春天
步頻是東北風，不三時會來掛礙
寂寞的鏡頭猶停睏佇咧世間的酸苦
走揣拍交落的血脈，紅頭嶼蟲豸相放伴
出擢金鳳蝶仔嘛認捌白色花蕊的清芳
島嶼有岫有鳥歇，深山林內貓頭鳥來顧更
從到今，tu-tu-ú 的叫聲成做一首安魂奏鳴曲
拑牢牢阮拋荒的心岸。行踏遮的揜貼景緻
愛會記得歡頭喜面，沓沓仔看覓鹿仔樹生湠
天無絕人路，寬寬仔繩Valino跨海旋藤
生態愈湠愈深，萬物共生的樂園愈楦愈闊
一枝草拚勢牽挽，一點露發穎牢枝
毋知是啥人落落來這粒光炎炎的真珠？
天合合，毋驚生狂雨洗盪愛覺醒的運命
沃鹹鹹的血汗，綿爛掖落本土種的子
暝思夢想彼跤兜，有澹潤的塗肉好種作
性命信號對青蘢蘢的芋仔田大出
長湧相偃袂倒，數念斯當時揜風搢水
搭胸坎欲守護這塊粒積千年的島嶼形影
攑頭看！瘦梭的虛空猶有星光閃爍
秋凊疏櫳的記持浮動，當咧四界漂流
註：
1、蘭嶼舊名號做「紅頭嶼」，是熱帶林木遍佈的火山島地形。
2、八丈芒達悟語「Ayo」，規束戛火做火把，成做暗時掠飛烏的光源。
3、敆板船(華語:拼板舟)達悟族語「Tatala」。佇敆板船頭前有親像目睭仝款的同心圓符號，有予人出船保平安佮指引方向的意義。
4、「金鳳蝶仔」是當地特有種蘭嶼珠光鳳蝶。馬鞍藤達悟族語「Valino」。
5、古早時Tao人共當地特有種－蘭嶼貓頭鳥的叫聲「tu-tu-ú」，認為是歹吉兆，見若叫聲出現就有歹代誌會發生。蘭嶼貓頭鳥的數量一直真少，這馬蘭嶼貓頭鳥已經列入國際動物保護名單內底。達悟族語「Tao」是人的意思。
註：2024台灣文學獎台語新詩首獎作品。