文/康原　圖/梁一念 　康原簡歷　　　　 康原，一九四七年出生在芳苑鄉，現居在彰化市香山里。 曾任賴和紀念館館長。曾獲第六屆磺溪文學獎特別貢獻獎，曾獲吳濁流文學獎新詩獎，曾獲行政院叢書「金鼎獎」。彰化師大台文所「作家講座」，南華大學文學系「講座作家」，彰化師大「彰化學」叢書總策劃。2021年彰化師大駐校作家。 重要著作：《懷念老台灣》《台灣囝仔歌的故事》、《八卦山下的詩人林亨泰》(玉山社出版)《人間典範全興總裁》、《囝仔歌教唱讀本‧附CD》《台灣囝仔歌謠》《追蹤彰化平原》《逗陣來唱囡仔歌‧六本‧附CD》、《港都的心靈律動》、《番薯園的日頭光》、《噴霧氣飛出的春天》、《施並錫的魅力刀與彩筆誌》、《臺灣島海岸詩》、《番薯記持臺灣詩》、《浮動－公佮孫的台語詩畫》 (晨星出版社出版)《文學的彰化》《八卦山》《二林的美國媽祖》(彰化文化局)、《花的目屎》《滾動的移工詩情》、《台灣水塔地景風貌》(遠景出版社)、《桃園媽祖的慈悲》……等近百本。 2011年7月初2，兩個查某孫一念佮一心，坐飛行機去北美加拿大的多倫多，做小小的留學生，彼時陣阮真正毋甘，罵in父母實在殘忍，囡仔細漢就予in孤單生活佇他鄉外里，北美洲的天氣真寒，路頭真遠閣無親情朋友踮厝邊，若發生代誌真正叫天天袂應，叫地地袂靈。查某囝佮囝婿攏講愛予in學習獨立。阮兩個老翁公婆只有為這兩個查某孫祈禱，嘛懇求佛祖鬥保庇in平安無事，早日完成學業轉來臺灣。 到今仔日已經十偌年，這段時間in兩個姊妹仔完成高中、大學的課程。梁一念佇2020年畢業佇多倫多安大略藝術大學OCAD，畢業以後佇多倫多Marketing Automation Canada做廣告設計；梁一心畢業佇Watreloo滑鐵盧大學數學系，這馬入去多倫多的皇家銀行上班。這兩個姊妹仔佇學校讀冊的時陣，2012年進入多倫多台商會做義工，服務臺灣的同鄉，佇in讀冊的時陣，予真濟前輩牽成佮幫忙。2021年6月梁一念為著報答臺灣鄉親的照顧，伊接任多倫多臺灣青商會會長，梁一心接任多倫多臺灣青商會財務長，希望以後也會使為多倫多少年的臺灣青年服務，為臺灣做一寡仔代誌。因為有真好的表現，佇 2022年一念予人選作國際青年的親善大使，9月11日接受臺灣僑務委員長童振源的頒獎，受著加拿大多倫多台北經濟文化辦事處處長陳錦玲觀照佮愛護。 佇這十年中間，阮兩個老翁公婆仔，佇in歇熱的期間，2013年、2017年兩年暑假，有去過多倫多踮兩個月，佮in生活做伙，看in咧學習的過程按怎生活，按怎學習做人佮辦事；這十年中間是對囡仔轉大人的過程，是真重要的學習階段。阮轉來臺灣以後定定想著這兩個查某孫仔，佇2014年梁一念轉來臺灣歇熱，送我一本伊的插圖手冊，佇第一頁寫著：獻予上愛的阿公──阿念。阮若咧想in的時陣，就掀這本冊內底的圖，彼時陣逐張圖攏有寫出圖的題名，看圖的題名就知影心內咧想啥物，自細漢一念的個性就較狡怪，這本插圖的冊，畫的圖表情嘛較譀古，予人感覺真激骨閣好笑，描寫出一念喜、怒、哀、樂的情緒，共伊咧思念的人物，攏畫畫入去。 這本畫踮小魚《且說魚趣味》的空白筆記簿內底的圖像，變成阮數念一念、一心的時陣，提出來掀掀看看的圖像天書，若親像公佮孫的傳情密語。攏總有兩百十二張的圖，第一張圖是畫伊家己讀大學的第一年，圖像喙笑目笑，倒手攑懸懸，頭殼頂懸寫「Freshman」，圖下跤寫著「大一」，中英文對照，嘛有畫厝內的親人、阿公的面腔、佮伊上好的狗仔、伊家己的表情，最後一頁是畫臺灣地圖，畫題是「Home」，用想厝做結尾。這本冊攏囥佇阮的皮包仔內底，閒的時陣想著這兩個北美洲的查某孫仔，就提出來看伊畫的圖、數念in的形影佮笑聲。 每一禮拜的拜六抑是禮拜日，這兩個查某孫仔攏會用手機仔的line敲電話予阮，報告in一禮拜的生活情形，透過手機的影像看in一日一日大漢，解消阮心頭的鬱卒。有一工一念共阮講：「阿公，以後咱講電話的時陣，咱來講臺語。」阮的心肝頭雄雄搐一下，是按怎這兩個佇臺灣攏講華語的囡仔，較早叫in講臺語攏無愛，這馬是毋是「暗頭仔食西瓜，半暝仔反症。」佇外國才欲學臺語？阮真好奇就問伊：「是按怎這馬才想欲來學臺語？」 「阿公，阮佇多倫多，真濟外國人攏認為阮是中國人。」一念閣講:「中國人佇多倫多予人歹印象，阮若講臺語較袂予人叫是阮是中國人，阮若講臺語佮in講話有精差，就知影阮是臺灣人，毋是中國人。」我聽了心內咧想，這馬in已經知影語言毋但是溝通的工具，語言是族群的符號，代表著這個族群的性命，也會使予人分清楚無仝的族群。阮的心內感覺真歡喜，隨喙共伊講：「若按呢好。講電話用臺語以外，阮共你這幾年畫的插圖，逐張插圖寫一首臺語詩，閣錄音寄予恁，也會使予恁學語言佮臺灣詩。」阮心內咧想，一念這幾年若想厝佮親人的時陣，用畫圖來解心悶，阮會問一念畫遮的插圖的心情。當阮咧寫這寡仔臺語詩的時陣，攏對圖面去想一念創作的心情，來寫阮的詩。 這擺一念畫的圖攏無題名，阮對伊的圖面構圖、色彩、表情、符號去想伊欲表達的思想佮感情，因為圖像是引發阮創作詩的原點，加上阮對伊生活上的聯想，伊捌對阮講過的言語，閣用阮的角度去思考，阮的創作毋是看圖講畫，親像有一張圖，是佇房間內咧讀冊，阮想著伊去留學，閣咧講欲學臺語的問題，阮徛佇伊的觀點來寫詩，所以共詩題寫出〈留學〉學語言的心情： 出來外國　留學 逐工　愛背A B C 寫著　豆菜芽黏做伙的字 阿母　　教阮的言語 阿公咧唸的俗語佮歌詩 漸漸來 phng見 這首詩寫著真濟臺灣人主張愛學英語，漸漸共家己的母語放袂記的事實。另外，阮看著伊一張圖，畫一個查某囡仔坐踮窗仔邊，面對窗仔外的天星，佇阮的經驗內底窗仔是厝的目睭，拍開窗仔親像拍開家己的內心，所以阮用〈心窗〉來描寫： 窗仔　拍開厝間的目睭 看見　天頂閃閃爍爍的星 天公伯仔　笑微微 月娘是快樂的　仙女 窗仔　是悲哀的 暗暝　少女內心的孤單 這個世界是予人　無奈 關袂起彼扇哀愁的 心窗 這首詩運用「星」、「月娘」、「仙女」、「暗暝」、「窗仔」的意象，去表達一個離開故鄉真遠的留學生，孤孤單單坐踮窗仔邊，透過暗暝的景色，星光的閃爍，月娘的象徵，寫一個旅外學生的哀愁。仝款有一種流浪他鄉外里的情形，畫出孤單一個人，行佇充滿著寂寞佮冷冰冰的暗時，有溫庭筠「雞聲茅店月，人跡板橋霜」的孤單情景，彼款雞聲予人心寒，阮借用「月到中秋分外明，每逢佳節倍思親」的詩境，來描寫這張圖的詩〈中秋暝〉的孤單： 中秋暝　月娘的光照著 白泡泡　雪頂孤單的 浪子形影 勻勻仔　一步一步 向前行，風 閃過阮身軀邊 攏無 相借問 一念除了想厝、懷鄉的圖有畫真濟以外，有一寡仔佇學習過程中的壓力，予伊感覺袂喘氣，有一張圖真寫實，畫一個囡仔攑真濟物件，表現出接載袂牢的姿勢，農業社會中，父母出去做工課，定定是大一歲的阿姐偝細漢的妹妹，這款情形佇臺灣俗語會用「三兩貓咬四斤鳥鼠」來比喻，所以阮才會寫〈貓佮鼠〉的這首詩： 細漢　細粒子的 阿妹仔　偝阮 阿母攏講伊 三兩貓咬四斤鳥鼠 這馬　個性賭強 毋認輸的阮 恬恬夯起　做大姊的 擔頭　啥人知影 重量偌濟？ 一念有一張較抽象的圖像，阮看起來有「流水」的模樣，阮共這條溝仔水看做伊人生的學習過程，透過溝仔水的特色，來講性命的一寡仔哲理，對內山流對海底，親像咱人的生命過程，阮用〈溝仔水〉來寫： 對深深的內山 流入茫茫的大海 沿路行路 輕鬆唱歌 暝連日 日連暝 你敢知 阮的歌聲是歡喜 抑是悲傷？ 伊有畫一張老人孤單咧啉咖啡的圖，燒滾滾的咖啡杯仔衝出來的煙霧，掩崁佇老人的目睭，阮共想做這是伊咧思念阿公畫出來的圖，所以阮著借圖來寫阮的心事，寫這個老人有真濟心事，咧想真濟代誌，所以阮寫〈頭毛佮貓毛〉表達出伊想阿公，阿公的心事嘛是有思念孫仔的感覺： 予時間染白的頭毛 親像溝仔底的菅芒花 秋天的季節到矣 阿公的頭毛崁一重雪 面皮開真濟溝仔 流袂了的雪，化成 血水 頭毛若白　冬天就到 輪落西爿海中的 日頭，心事較濟 貓毛 伊嘛有關心著地球、工場的汙染問題，除了排出烏煙的廢氣以外，嘛有廢水流入海洋底，海底的生態受到影響，看著這張圖面，阮用〈海洋世界〉去寫這首詩： 放烏煙的 怪物 將伊的屎屎尿尿 流入清氣的 海洋世界 予海水變成有臭味 各種生物 魚仔、海豬、海龜 揣無 泅水的所在 一個創作藝術的人，伊畫的圖表達出伊的心情佮關心的代誌，佇一念讀冊的時陣，看著的是學校佮伊身軀邊的生活，一工一工攏是重複的，是一種無聊佮無奈的代誌。猶會記得卡繆講過一句話：「無啥物比無局佮重複無味的人生較痛苦。」每一個人攏無愛重複仝款的代誌。這馬伊大學畢業進入社會服務，接觸的人佮代誌慢慢仔無仝，畫的圖像應該較有社會性，若無伊就會轉向對家己內心世界的深入探討，親像這首〈花矸佮花蕊〉： 一蕊　揣無適當花矸的 花　　恬恬仔開佇花園內 蝶仔、蜜蜂 相隨 花矸　若是無插花 無論伊　按怎變換姿勢 攏無法度 有春天的 氣味 這張圖是畫一個少女的自畫像，囥佇大細兩個圓箍仔內底，予阮想著攝影家羅蘭‧巴特捌問過：「當咱看一張人物相片的時陣，咱看著啥物？」這句話予阮想起這張圖片是畫的，這個圓箍仔阮共看做一面鏡，相囥佇鏡內有一種反省的意義存在，孔子公嘛有講：「吾日三省吾身：為人謀而不忠乎？與朋友交而不信乎？傳不習乎？」這是咧講做人的一種自我反省；但是這張圖阮用少女思春的角度去書寫，嘛是阮家己的內心想法，若親像咧臆查某孫的心理仝款，這款的年紀的少女，一定會有伊的感情問題。 公佮孫的言情密語，用插圖佮臺語詩的對話發表，這內底有阿公離開查某孫的心酸，孫仔去外國讀冊所遭遇的困難佮思念故鄉的哀愁，也是公孫放伴思念溝通的心橋，嘛是阿公為孫仔欲學臺語佮文學設計出來的課題，伊的圖若一直畫、阮的詩嘛一直寫，阮看伊的圖、伊讀阮的詩，透過這款方式來化解公孫的思念，嘛是萬里親情相倚並的見證。 將近十年來，一念畫圖、阮寫詩，做阿公佮孫仔親情溝通的心橋，這馬阮選出80張圖配詩，用《浮丼：公佮孫的臺語詩畫》做冊名來出版，規本冊分做四輯： 第一輯「望月春風」，大部分是描寫一個留學生咧思念故鄉的心情，看著孤孤單單的水鴨、中秋佇他鄉看著月娘、天星，佇家己孤單的時陣，攏會想起臺灣的親情朋友，一念透過畫筆來記錄伊的心事。 第二輯「花的言語」，這部分寫花、花蕊、花矸、花園等等，用花來寫查某囡仔的歡喜、受氣、悲哀的心情，帶有一寡仔暗示、象徵、比喻的寫作技巧，透過一念的圖面，去寫伊的思想佮感情。 第三輯「夢想家園」，有阿公、阿媽的形影，對臺灣厝裡的人的思念，留學生的鹹酸苦汫的經驗，嘛有讀冊的心情，對人情世事的感慨，閣有人佮人關係的觀察，嘛關心海洋生態佮社會變遷的情形。 第四輯「恬靜懸山」，透過照鏡的動作，寫真濟自我的反省，佇成長過程的心情記錄，透過貓、兔、鼠、魚寫性命的哲學。出版這本冊主要記錄兩位公、孫的感情，透過孫仔學臺語的代誌，紀念一位臺灣老人佮加拿大孫仔，透過畫尪仔佮臺語詩做傳情的密語；嘛會使分享予外國的臺灣囡仔，為想欲學母語的人提供另外一種方法，俗語講：「有心拍石石成金」，只要咱若有心，不管想欲做任何代誌，每一個人攏會當揣著伊家己的方法。