■鍾敏蓉 一張張青春發亮的眼神，沒有一顆淚水滴落。 應是在暗夜，低聲討論著 只是星子墜落或是，贏得獻花與禮炮的不朽 以及，熊熊火光的最後一眼，距離有多遠 而如刀刃切開大地的心口，為了更多春天的播種。你說 但聽，一張張清純無邪的名字 聲聲淚光的呼喚 全是花苞綻放後，花房裡粒粒的希望啊 為了更多的春天播種，你說 刀刃必得，切開每個母親的心口

■胡長松 黃徙先生的《台灣山海經》是伊的第四本台語詩集，對上早的植物誌的田園書寫到這本詩集，有一个咱愛特別注意的現象，就是詩人對早前台灣大自然現象的普查起鼓，沓沓進入精神面更加深入的挖掘。嘛會當講是伊的整體詩歌佇精神面的深化，這是值得研究黃徙詩歌的朋友來注意的發展。 這本詩集予咱想起歐洲象徵主義流派的詩歌，親像下底這款詩的寫法，重視詩人對物體表象之內的精神性的挖掘佮呼應： 〈台灣的手骨：老梅石槽懷思〉 大屯火山一爆發，阮隨噴出來 噴肉醬包雲，噴血包日頭 天地煮煮一大鍋 島嶼就是四面海水圍咧煮 會熟袂爛的骨 一直到海水慢慢仔焦才浮出石頭 石頭漸漸爛才看著性命爬上岸 280萬冬後，你徛佇阮的肩胛頭 敢有看著？阮手曲賰一支骨 嘛屈入無屈出！楗你 這首詩寫海岸的景緻，嘛寫自然史，最後共人的精神囥入這个280萬冬（長甲接近永恆）的時間來書寫，按呢，外象景緻所包涵的精神性，就予詩人巧妙透濫佇文字之中。 下底這首對野柳女王頭景觀的書寫嘛有類似的手路： 〈纏縛海岸〉 野柳女王頭 到底是石頭爛去 伊等待的目紋眼神 才一層一層刻成 少女向望 抑是海水焦去 伊追散去的頭鬃 才閣一絲一絲梳起來 梳做老人的眠夢，千萬冬 纏縛海岸 這種共精神深化的詩歌，的確予咱想著象徵主義的追求。這款詩呼應19世紀的英國思想家、評論家Thomas Carlyle所講的：「佇咱所講的象徵的這款物件永遠有對『無限』的具體表現抑是啟示，這種表現抑是啟示（指象徵的文字）加加減減是明確直接的；欲予『無限』佮『有限』透濫，按呢，予『無限』敢若是看會著的、會當行跤到的所在。」 Thomas Carlyle所講的「『有限』（表象）佮『無限』（永恆）透濫」，也正正就是黃徙這本詩集普遍的文字特色。佇詩人的文字內面，人的精神綴夢的翼股伸長： 〈夢叫人〉 20冬前我共土地挖空 一空一空烏櫳櫳 將向望攏埋入去烏暗 無想著老去的夢，閣轉來 叫我的人 夢是一款色緻一種滋味 日子睏去的種子 種落的時，陷眠沃水，醒來無記持 想講已經無望，結果春來叫門窗 老ê！愛等阮 佇這首詩nih，挖空的土地（有限）佮老去的人（有限），予（無限的）夢叫醒，「有限」佮「無限」佇詩句內面奇妙互動。 Thomas Carlyle另外佇〈The Hero as a Poet〉中有一段文字講：「詩歌是語言中的最高力量，是想像佮思想的具體表現。詩歌是靈魂的音樂，揭示伊上深層、上珍貴的情感，也表達伊的向望和驚惶。詩歌共咱對平凡無味的現實中導出來，開闊咱的眼界，予咱看著世界的媠佮奇妙。」這段文字，嘛是咱對黃徙的這款象徵主義詩歌上好的註解。 進一步來看，象徵主義所講的當然是對詩人個人主體精神出發的書寫，毋過，這本詩集關切的範圍毋干焦到個人的層面；詩人共台灣的地誌，伸長到整體台灣人精神面的書寫。這部份尤其佇第三卷有上充分的表現。比如這首〈烏水溝的夢〉，就是咧寫台灣海峽烏水溝對台灣的保護力，親像黑洞的力量，表示拒絕侵入的決心。這就是台灣人抗敵的決心。 〈烏水溝的夢〉 牛頓的頭殼如果像宇宙黑洞 遐爾仔有吸引力 蘋果墜落、天星跋落來 攏會黏佇伊的頭，就無愛因斯坦 時間空間 澎湖烏水溝若銀河的黑洞 遐爾仔有殺傷力 泅的飛的攏總會墜落 萬底深坑的烏暗，烏暗就是咧等 天光的夢 〈不平的太平洋〉是台語詩頭一遍共中國軍事基地寫入詩句。詩人仝款是徛佇台灣人整體的精神懸度寫這首詩。佇詩nih，中國海軍重鎮北戴河褪落伊對外的威嚴，敢若只穿一條誠笑詼的短褲： 〈不平的太平洋〉 別了北戴河，你欲坐軍艦 想講太平洋會當游泳 海水嫌傷清，叫艦隊抐予濁 褪褲，人才袂看著尻川 幾支毛 軍艦抐落，切開一片深藍佮碧綠 一離開彼時刻，紺色青色 大海島嶼隨閣合倚來 你的毛無法度潑墨！歹搦啊 不平的太平洋 按呢的詩，借觀察中國海軍的實力，寫出台灣人家己對海洋的自信。太平洋的國際情勢愈來愈牽涉台灣人未來生存的命運，黃徙的詩是明明白白的對抗，充滿氣力，是有飽滇的台灣精神的決戰詩！ 甚至詩人借詩歌獻戰策，比如下底這首： 〈水雷：蚵田防衛〉 王功到高雄海線攏吊蚵仔 遠遠看一片海中田 竹棑仔親像水牛犁風湧 犁來犁去，大海一條一條田溝路 予汗插滴學落雨 聽講以後若是兩岸相戰 敵人軍艦會犁過這片海田 按呢阮的田園莫吊蚵仔 換來吊水雷較有譜 予血四界濺沃沙埔 佇現此時普遍意愛軟弱書寫的台灣文壇，黃徙的決戰詩予咱新的空氣。詩nih敢若是宣佈：蚵田是台灣的海中田園，毋過，當台灣受威脅，蚵田嘛會是予敵人戰死的海墓。 這本詩集，對台灣的山海景緻落筆，對表象寫入萬物的精神面，閣對個人的精神面，寫到整體台灣人意識內面的決戰意識，是台灣現此時上寶貴的一本詩集。 前三卷的十句形式短詩，敢若短劍的節奏，筆者尤其意愛仝款的精神意志，來到第四卷，加強抒情的敘事，敢若溫柔的武士，倒轉來到永遠的故鄉。比如這首〈屈（ut）魚仔屈月光〉： 〈屈魚仔屈月光〉 一尾一尾虱目魚屈予彎彎 曲曲 親像一眉仔月娘，屈入夜色 上底層上食力，愛像彎弓 用骨，替頂面楗咧牚咧 籠面的 直直倒插，若射箭 箭頭攏兩蕊金金的目睭 睨～月 虱目魚水中屈好，擔上塭仔岸 一籠一籠金銀色沿路排列 魚鱗反射 一車一車月光載咧走 阿爸騎鐵馬追佇月光後 到行口，喝魚仔 喝聲用抨的 上鮮的！魚仔目含水 睨～你 中晝，阿爸轉來厝內 屈佇眠床，若一尾死魚仔 目睭沙微沙微含水 暝暝～月光 攏屈入去伊目睭仁 夜夜～反射 睨～珠淚 這首詩用上堅心的「屈（ut）」的動作，共讀者吸入對勞動的父老序大的記持佮感情的箍圍nih，敢若是咧提醒，咱所有的精神意志、所有的決戰，終其尾，猶是愛轉來到佇這佇永遠的精神徛家。這是海德格（Martin Heidegger）所講的「詩意的徛居」，毋過，這个詩意，並毋是免費得著的，是世世代代的台灣人決心戰鬥、拍拚，才通得著的寶貴詩意。 這本《台灣山海經》是黃徙送予台灣上寶貴的的禮物，我期待所有台灣有情男女，逐家攏來讀這本詩。